ភ្នំពេញ៖ រដ្ឋាភិបាលកម្ពុជា នឹងរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជាតាមរយៈនយោបាយឈ្នះឈ្នះ និងខួប៥ឆ្នាំនៃការកសាងវិមានឈ្នះឈ្នះ ចាប់ពីថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០២៣ នៅវិមានឈ្នះឈ្នះ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។

ថ្ងៃចាប់ផ្តើមនៃកម្មវិធី នឹងមានវត្តមាននាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត ធ្វើជាអធិបតីភាព។ ក្នុងព្រឹត្តិការណ៍ជាប្រវត្តិសាស្រ្តរយៈពេល ៣ថ្ងៃ នឹងមានការរៀបចំកម្មវិធីពិព័រណ៍អំពីសមិទ្ធផលរាជរដ្ឋាភិបាលនានា ពិព័រណ៍ម្ហូបអាហារ និងផលិតផលខ្មែរ សិល្បៈទស្សនីយភាព ការប្រគំតន្ត្រី ពិធីអាហារល្ងាចត្រៀមរាប់ថយក្រោយឆ្លងឆ្នាំសកលនៅយប់ថ្ងៃទី៣១ ខែធ្នូ ឆ្នាំ២០២៣ និងមានការបាញ់កាំជ្រួចអបអរសាទរ។

ក្រសួងមហាផ្ទៃ នៅរយៈពេលកម្មវិធី ៣ថ្ងៃនេះ នឹងមានការរៀបចំការតាំងពិព័រណ៍សមិទ្ធផលសំខាន់ៗរបស់ក្រសួងមហាផ្ទៃ នៅវិមានឈ្នះឈ្នះ៕